-विद्यापीठाच्या इंक्युबॅशन सेंटर मधील स्टार्टअप

कमीत कमी वेळेमध्ये अधिक उत्पादन मिळवता यावे म्हणून विद्यार्थ्यांनी मिठाई कटिंग मशीन तयार केली आहे. राष्ट्रसंत तुकडोजी महाराज नागपूर विद्यापीठाच्या सेंटरमधील 'अष्टटेक' या स्टार्टअपने ही मशीन तयार केली आहे. नागपूर येथील खाद्यपदार्थ निर्मितीत नामांकित व्यवस्थापनाला ही मशीन पाठविण्यात आली आहे.

खाद्यपदार्थ उद्योग क्षेत्रामध्ये झपाट्याने वाढ होत आहे. या उद्योग क्षेत्रामध्ये उपयुक्त अशा नवनवीन उत्पादन तसेच मशीनची मागणी वाढत आहे. या क्षेत्रातील वाढती मागणी लक्षात घेता विद्यापीठाच्या अष्टटेक प्रायव्हेट लिमिटेड या स्टार्टअपने कमी वेळेमध्ये अधिकाधिक मिठाई कटिंग करण्याची मशीन तयार केली आहे. तीन महिन्याच्या अत्यंत कमी कालावधीमध्ये कमी खर्चामध्ये ही मशीन तयार करण्यात आली. विद्यापीठाच्या इंक्युबॅशन केंद्रामधून संबंधित व्यवस्थापनाकडे मिठाई कटिंग मशीन पाठविण्यात आली आहे. अष्टटेक प्रायव्हेट लिमिटेड या स्टार्टअप मधील हर्षद वसुले, रोहित शेंडे व अक्षय इंगोले यांच्या पथकाने हे नवीन संशोधन विद्यापीठाच्या इंक्युबॅशन केंद्राच्या मदतीने केले आहे. मिठाई कटिंग मशीन तयार करणाऱ्या विद्यार्थ्यांचे माननीय कुलगुरू डॉ. सुभाष चौधरी, प्र-कुलगुरू डॉ. संजय दुधे, कुलसचिव डॉ. राजू हिवसे, नवोपक्रम नवसंशोधन व साहचर्य मंडळ संचालक डॉ. राजेश सिंह, इंक्युबॅशन केंद्रप्रमुख डॉ. अभय देशमुख यांनी अभिनंदन केले आहे. 

एका मिनिटाला २४ किलो मिठाईची कटिंग

अष्टटेक स्टार्ट अपने तयार केलेल्या मशिनद्वारे एका मिनिटाला २४ किलो मिठाईची कटिंग केल्या जाते. त्यामुळे यापूर्वी हाताने केले जात असलेल्या मिठाई कटिंग च्या श्रमाची देखील बचत होत आहे. हाताने मिठाई कापण्यास बराच कालावधी लागत होता. मात्र, या मशीनद्वारे मिठाई कट करण्यास अत्यंत कमी कालावधी लागणार आहे. त्यामुळे उत्पादनात देखील वाढ होणार आहे.

संगणक प्रणालीचा वापर

ही मशीन ऑपरेट करण्याकरिता संगणक प्रणालीचा वापर करण्यात आला आहे. संगणक प्रणालीवर विशिष्ट आकाराची (साईज) कमांड द्यावी लागते. कच्चे साहित्य मशिनच्या एका ट्रेमध्ये ठेवल्यानंतर त्याचे दिलेल्या आकारानुसार तुकडे मशीनद्वारे केल्या जाते. संगणक प्रणालीद्वारे विविध आकाराची मिठाई या मशीनच्या माध्यमातून तयार करता येते.

डबल डेक मशीन

विद्यापीठाच्या इंक्युबॅशन केंद्रामध्ये तयार करण्यात आलेली मिठाई कटिंग मशीन ही डबल डेक आहे. या मशीनमध्ये एकाच वेळेस मिठाई आडवी तसेच उभी कापली जाऊ शकते. मशीनची कटिंग क्षमता अधिक असल्याने दिवसाला मोठ्या प्रमाणात मिठाईचे उत्पादन करणे शक्य होते. याच स्टार्टअपने यापूर्वी देखील अशा प्रकारचे मशीन तयार करून उद्योगास सुपूर्त केली आहे. 

स्वच्छतेवर भर

कोरोना काळामध्ये मानवी स्पर्शातून संसर्गाची भीती काय असते हे संपूर्ण जगाने अनुभवले आहे. त्यामुळे तंत्रज्ञानाच्या मदतीने मानवी स्पर्श अत्याधिक कमी करून मशीनच्या माध्यमातून विविध उत्पादनांची निर्मिती केली जात आहे. अष्टटेक या स्टार्टअपने देखील ही मशीन तयार करताना स्वच्छतेकडे अधिक लक्ष दिले आहे. 

ठळक वैशिष्ट्ये

१) डबल डेक मशीन

२) एका मिनिटाला २४ किलो मिठाई कटिंग

३) स्वच्छतेवर अधिक भर

४) संगणक आज्ञा प्रणाली

५) सर्वो रिमोट सिस्टिमचा वापर

६) कोणताही आकार ठरविण्याची क्षमता

७) वेळेची बचत

८) उत्पादनात वाढ